Það er laugardagur og húsbóndinn er búinn að skúra. Nýjustu fyrirmælin frá Svíaríki (meiri stera) eru að virka, ég er heldur skárri og ætla meira að segja að hætta mér í smá gönguferð á eftir. Ég fæ samt ekki að vera lengi á auknum skammti, það á að endurskoða stöðuna strax á þriðjudaginn. Enda er þetta náttúrulega bölvað eitur, sem étur beinin og hvaðeina.
Af hannyrðum er það að frétta að fyrri sokkur litlu dömunnar er frágenginn og búið að fitja upp á þeim seinni. Næst á dagskrá er svo fína jólapeysan, en ég ætla líka að grípa í jólatrésdúkinn minn stóra sem ég hef notað einu sinni, þó hann sé ekki nema hálfnaður. Ég var nefnilega svo ósvífin að snúa bara ókláruðu hliðinni inn í horn þar sem hún sást varla. Í nýja húsinu verður væntanlega mun rýmra um jólatréð, svo ég ætla að reyna að klára eins og einn eða tvo jólasveina í viðbót og kannski tvö tré eða svo (það eru sex af hvoru í allt).
