Vor

Vorið er staðreynd hér á svörtu ströndinni. Ég hef reyndar ekki rekist á tjalda ennþá, en ég heyri í þeim oft á dag.

Útsaumurinn á bláa hattinum mjakast áfram og ég er að velta næsta prjónaverkefni fyrir mér. Ég hallast að því að það verði hneppt lopapeysa á húsbóndann, það er orðið þónokkuð síðan ég prjónaði eitthvað á hann (fyrir utan vettlinga og húfuræfil) en þessa peysu prjónaði ég í september 2007:

Ég hef aldrei verið alveg ánægð með hana. Hún er í styttra lagi og munstrið að framan dróst aðeins til þegar ég saumaði rennilásinn í.
Ég geri ráð fyrir að teikna upp munstur í nýju peysuna, en ég gæti líka alveg tekið upp á því að nota bara eitthvað tilbúið. Það kemur í ljós.