Category Archives: Crochet

Sum stykki taka lengri tíma en önnur.

Góð kona byrjaði á þessari jakkapeysu fyrir margt löngu, sennilega á sjöunda áratugnum. Hún rataði til mín hálfkláruð, bakið og annar boðungurinn tilbúinn. Það var ekki nóg garn í ermarnar og peysan var afskaplega stutt.

Hún beið í poka hjá mér í nokkur ár, en í vetur ákvað ég loks hvernig ég ætlaði að klára hana og hófst handa. Ég notaði það sem eftir var af garninu í ermar, eins langt og það náði og bætti svo við með afgöngum og hvítu kambgarni.

Vinnan gekk svona og svona. Ég lagði peysuna til hliðar nokkrum sinnum, gerði ein stór vandræðaleg mistök ( sem tengdust allt of þröngu stroffi sem gleymdist alveg að máta) og þurfti þar af leiðandi að rekja heilmikið upp.

En nú er peysan loksins tilbúin.

Heklað utan um tölur

Mér finnast tölurnar setja heilmikinn svip á peysuna. Það er afar auðvelt að hekla utan um tölur, leiðbeiningarnar eru hér.

Þessi lopapeysa er búin að vera í uppáhaldi í mörg ár.
Svo mörg reyndar, að þetta gerðist:

Auðvitað hefði ég getað komið í veg fyrir að gatið myndaðist. Það er mjög auðvelt að styrkja lykkjurnar innan frá um leið og þær fara að þynnast. En ég tók ekki nógu vel eftir og þar sem ég legg oft hönd undir kinn, (og þar með olnbogann á borðið) fór sem fór.

Ég lét gatið ekkert á mig fá, og notaði peysuna nokkuð lengi þrátt fyrir það. Þetta er að mestu heimapeysa, mjög þykk og hlý, úr þreföldum plötulopa. Alveg tilvalin flík til að hlýja sér í, við kyrrsetur í hálf köldu húsi.

En við svo búið mátti ekki standa. Húsbóndinn var farinn að horfa undarlega á mig og ég heyrði rödd móður minnar í huganum, messa um að það væri allt í lagi að ganga í bættum fötum, en alls ekki í götóttum.

Svo ég tók mig til og gerði við gatið. Ég tók tímann, ,,aðgerðin” tók 15 mínútur með öllu, leit að heklunál og garni líka.

Þetta er kannski ekki fullkomin viðgerð, en peysan en mun betri en áður og þetta er nógu gott fyrir mig.

Ég heklaði hjartað ekki eftir uppskrift, heldur byrjaði bara á einni loftlykkju, heklaði svo 3 fastalykkjur í hana. Eftir þau er aukið út í fyrstu og síðustu lykkju í hverri umferð, þar til hjartað er orðið nógu stórt til að hylja gatið. Þá taka við tvær umferðir eða svo, án útaukningar. Bungurnar á hjartanu eru myndaðar með því að taka úr við fyrstu og síðustu lykkju í hverri umferð, þar til tvær lykkjur eru eftir.

Hér má finna prýðilega hjartauppskrift með myndum, og hér eru þýðingar á hekl orðum úr ensku yfir á íslensku.

Blúndur eru fallegar. Jafnvel þær allra einföldustu, eins og þessar:

Þessi lengja á að fara á grátt hjarta. Ég hef aldrei heklað gráa blúndu áður, hvað þá prjónað grátt hjarta, og ég veit hreinlega ekki hvað kom yfir mig. En ég mun bæta við (mildum) litum með útsaumnum.

Þessar fallegu hvítu blúndur eru hluti af jólagjöf. Hinn hlutinn var öflugur blandari, sem hafði verið lengi á óskalistanum.

Ég er mjög hrifin af þeim, en veit ekki enn hvað þær ætla að verða.

Og svona í framhjáhlaupi, uppskriftin að töskunni Memories of Summer er nú til sölu á ravelry.

Reyndar bara á ensku.